درب الفرح دربك يا قديسنا

مارونايت - من قبل بليلة (22 الشهر)، بتبلش الناس من كل الطوايف تنام ع دروب عنايا. هونيك شعبنا بيعرف كيف الراحة النفسية بتكون، لأنو بجوار ربنا بتختفي الخطية. ع هاك التلة مننسى أوجاعنا وبيختفي ظلم زعما كان مفروض يكونوا هني المسؤولين عن مصير رعاياهم. الزعامة عند تجار الارض إحتقار، والقداسة عند ناسك المحبسة هيي إحتضان الناس اللي طحنها جور هالايام.   يا امير قلوبنا وشفيعنا، نحن مش بس ب 22 من كل شهر منتذكرك، إنما انت كل لحظة، وعَ مدى الكون، بقلوبنا وتفكيرنا وحسرتنا.  قلوبنا صارت من كل الميلات مشلعة، أفكارنا من ظلم اللي قادونا صايرة مشتتي، ومعنوياتنا صادقت الخيبات اللي ما كانت تنتهي. سدوم وعمورة قليلة علينا بعد اللي وصلنالو، والكذب والخنوع والعهر والانبطاح صاروا ملجا المهزومين عنا، أخلاقنا صارت صحبة مع اسواق النخاسة والفقر بحاكي دموع الناس المقهورة.   يا شربل ملجانا وحدك إنت، من بعد الله وإمو رجانا عندك إنت. تشفع فينا عند رب الكون وخبرو إنو المسيحي والمسلم والدرزي من شعبنا بأرض القداسة عم يِنْزَلْ بعد ما حول يوضاسيو هالزمان ايامنا لدرب جلجلة ما بتنتهي. لهيك حجم المعاناة اللي بتشوفها بعيوننا بزوايا وع بواب ديرك ومحبستك بتخبر كل الكون قديش في حزن بقلب كل لبناني.   ويا هاك الختيار اللي كان طالع من يومين ع درب القديس، لأنو ما بقالو رجا غيرو، سامحنا لأننا ما عرفنا نعمل وطن، سامحنا لأنو ضحينا وسرقولنا تضحياتنا، سامحنا لأنو ما عرفنا قيمة دم الشهدا، سامحنا لأنو ما عرفنا قيمة رجال الايام الغابرة والصعبة.   يا شربل ساعدنا، يا شربل حمينا، يا شربل خلي عينك علينا.                                                                                                                                                                                        جورج يونس