افخم قصر لأفقر انسان بلبنان

مارونايت - ​اليوم كنا بأفخم قصر بلبنان مع افقر وأودع إنسان! هونيك بأرض القداسة، مطرح ما راح صوت الاوادم التفضيلي، في شربل مخلوف قديس لبنان بدون القاب فانية. بتحس حالك ببيتك وكتير قريب من السما وراعي القصر منو "دكتور" إنما راهب فقير متواضع بعدو لليوم بنام ع بساط عالارض وبيحضن كل الناس وخصوصاً الموجوعين وبفيض بالاعاجيب عليهم بلبنان والعالم ومن لبنان وللعالم وبابو ما بعمرو تسكر.                                                                                 بعنايا بتشوف دموع الناس من كل الطوايف عم تكرج بصدق ومحبة وبدون تمثيل، لوحدها ع خدود مكللة بالقهر والمعاناة والاوجاع المتراكمة من أفعال ناس كانوا مفترضين يكونوا هني مسؤولين عن شعبهم إنما لسوء الحظ باعوا وتاجروا فيه وبنيوا إلهم القاب وأمجاد فانية بهالدني وما بدهم يفهموا إنو ما رح ياخدوا شي منها معهم وقت اللي عدالة السما بدها تعيطلهم تتشوف وزناتهم شو عملوا فيها!                                                                                                                                                                نحن لما منبكي ع عتاب مارشربل لأنو هونيك ربنا بيسمعنا اكتر وبتكون بواب السما مفتوحة وقلوبنا بيضا، ومننسى إجرام طبقة سكرانة بالعظمة والعنجهية ت الله يصطفل فيها، ومنحكي مع الرب بدون حواجز وهو بيستقبل دعواتنا بكل تواضع وعطف ومحبة. بالنهاية مين ما بيتمنى يكون ساكن بقصرك بهاك الأرض المقدسة؟ ولهيك وكرمال وجعنا يا شفيع لبنان خلي عينك عالاوادم الباقيين بهالبلد وضلك يا شربل صلي عنا.                                                                                                                جورج يونس