ناس قلقانة، وناس غفيانة، وناس تعبانة، وناس جوعانة، وناس يأسانة، وناس مرضانة، وناس هشلانة...
ومن ثاني ميل ناس بْتٌِدِعي الغنا وهي مجلجلة بالغبا، وناس مصنفي حالها بين الكبار وهي ازغر من الزغار، وناس بالتبعية والانبطاح فرحانة، وناس بمجد فاني سكرانة، وناس ما بتشبع ونهمها جواني، وناس من برا الماس ومن جوا مْداس، وناس بتحمل صور البرايا وهي مزنرة بالخطايا، وناس صابغة حالها بالوطنية وهي معمشقة بالذمية، وناس بايعة الرسالة وغاطسة بالعمالة، وناس لابسة الطهارة ومعدنها دعارة، وناس وِرمانِة وبالتفشيخ بًطرانة، وقديش بَعِدْ بدنا نْعِدْ لَنْعِدْ والعمر رح يخلص وقرب ياخدنا عالمقلب الثاني... قد ما تكون مجلل حالك بالذهب، بيبقى معروف مين بيلبس الجلال. وان طالت نشوتك بْعَظَمِة فانية بنيتها ع وجع الناس، بتبقى صغير بعيون الاوادم اللي هني بعين الله كبار وبيبقى مكوِنَك نفحة من ربنا ورسمالك بالنهاية شوية جمر وكمشة تراب
0 Comments
Leave a Reply. |
صفحة الخطاب الحرّ على موقع مارونايت نيوز، تنشر مقالات لأصحاب رأي، وهي لا تعبر بالضرورة عن رأي الموقع أو مواقفه. وتبقى حريّة التعبير هي الأساس، والمناقشة الفكرية البعيدة عن الغرائز هي المبتغى
Archives
April 2023
|