​كم يوم وجايي يسوع

مارونايت
​رح يعرف أكثر، ورح يشوف أكثر، ورح يتألم أكثر
رح يرجعو جروحاتو ينزفو بس هالمرة بعيد ميلادو
رح يفتش عالزينة وما رح يلاقي إلا العتمة بشوارع بيروت المنكوبة وبيوت وطننا المهجورة
رح يعد شجرات العيد ويلاقيها قلت كتير عنا لأنو كتير ناس فلو وكتار اللي ماتو
رح يزور البرادات الفاضية والبسمات المسروقة والنفسيات المدمرة
رح يلاقي كتير إمات لابسة أسود هيي وعم تستقبلو
رح يعرف حجم الفرق بين فرح الثورة ضد الظلم السنة الماضية وقهر الناس المنهوبة السنة
رح يعد الشمعات بزوايا وطني ويلاقيهم كتير قلال صارو
رح يستفقد ل لهدايا تحت شجر العيد
رح يشوف إنو المغارة السنة ببيوتنا معمولة من دموع شعبنا بالسنة اللي مرقت
رح يمشي بين ردم البيوت المهدمة واللي صارت متروكة ع "المدور
رح يحس بالبرد تحت سقوف القرميد اللي كسرها الأهمال ب "الجميزة
رح يسمع صفير الصقعة من البواب والشبابيك المخلعة والحيطان المشققة ب "الكرنينا
رح يبارك الجثث اللي بعدها مفقودة ع مرفأ بيروت
رح يبكي لما يشوف ناس كانو عايشين ببركتو واليوم صارو ناطرين الرحمة ع بوابو
رح يعد الناس ويلاقيهم صارو قلال
رح يترحم عال بعدهم طيبين منا بعد ما استقبل اللي راحو من هون عالسما
رح يفتش عالضحكة وما رح يلاقيها إلا ببيوت اللي سرقو شعبو ودمرو وتاجرو فيه
رح يخبرو إنو كتير قلال الرهبان والأباء اللي وقفو وساندو أهلنا اللي طحنتهم الأشهر الماضية
رح تنزل دموع مريم بس هالمرة ع حجم وجع شعب آمن بإبنا ع وسع الكون والمدى

مسكين يا وطن يسوع! مظلوم يا شعب الأجواع عنا! مقهور يا هاك السرو العتيق بجبالنا! يمكن نحن السبب، يمكن هني، ويمكن الغضب من عندك بسبب تجار هيكلنا! ما ترحمهم يا رب، ورجاع ضوي سراجك علينا، وزراع الأمل بقلوبنا. نحن عم نفتش عالرجا، والرجا عندك! إنشرو بكل الزوايا المقهورة اللي رح تمرق عليها، ووزع البخور بدل الدخان الأسود، والفرح بدل التعاسة، والخير بدل الفقر، وحمول معنا شوي هالصليب اللي صار حملو كتير كبير علينا، وقول لكل فاسد ومجرم عنا إنهم رجعو حملوك الصليب مرة جديدة لأن كل شي عملو بإخوتك الصغار كإنهم عملو فيك، وكل جايع ما أطعمو كأنهم ما أطعموك، وكل بردان ما أمنولو الدفا كأنهم ما دفوك، وكل عطشان ما سقيو كأنهم ما سقيوك، وكل واحد سرقولو تعب عمرو كأنهم سرقوك

يا طفل المغارة اللي جايي "نحن كتير منحبك". السنة بيوتنا كلها فقر ومخاوية البرد، حتى بالمغارة يمكن ما نقدر ندفيك! أتطلع فينا بعد كل هالسنين اللي جيناها ع هالأرض بس للمعاناة، وخلي رحمتك تزورنا لأنو مع اللي عنا بطلنا نعرف معنى الرحمة

يا رب إسمعنا، بجاه قدس السما وعظمة إرادتك لأنو كاسنا إنتلى وما بقى باقي من العمر أكثر من كل اللي راح. يا رب إستمع صلاتنا وصراخنا الآتي اليك وحدك وليكن إسمك مباركاً كما دائماً فتحل علينا نعمة القدوس وتعود المحبة والطمأنينة والسلام لتعانق شوارع وقلوب وطننا وشعبنا المنكوبين
بجاه ميلادك وزيارتك لعنا إرحمنا يا رب
جورج يونس
هلقد بحبك يا يسوع ويا لبنان