خبرونا كيف منكمل؟ بقلم جورج يونس


عن جد ما بدنا منكم شي

بس بْحَلِفكم بأغلى شي عندكم

تخبرونا عن جد كيف منكمل؟

يا زعماء هالبلد، يا مسؤولينا، يا تجارنا، يا بطركنا، يا مفتينا، يا شيخ عقلنا، يا قائد جيشنا، يا اصغر صاحب نفوذ، ويا كل مطران وأباتي وشيخ وإمام بكل مؤسساتنا الدينية عن جد قولولنا!

طيب اذا انتو عايشين وكلو منبطح قدامكم وكل شي واصل لعندكم بس اكثرية الشعب مش هيك!

واذا انتو ما عم بتموتو ع بواب المستشفيات لأنو كل شي مأمنلكم ولانو بعدكم عم بتلاقو الدوا بس نحن مش هيك!

واذا انتو ما سرقت المصارف اموالكم، المش حلال، وخلوكم تهربوها، بس نحن اموالنا كلها راحت وعم ننذل كرمال ٣-٤ مليون بالشهر!

واذا انتو عم تتخانقو كرمال زيادة نفوذكم وحصصكم، ايه نحن صار كل همنا نموت طالما انتو بعدكم موجودين!

وإذا انتو كل يوم بتشترو ثياب جداد وغالية، ايه نحن ضيعنا عناوين الاسواق!

واذا انتو ما بتعرفو شو يعني لقمة مغمسة بالدم، سألونا وسألو ولادنا اللي عم ينحرمو من كل شي، واللي عم يتغربو ويتبهدلو ع أخر هالدني تإنتو وولادكم تبنو قصور ومجد باطل وتتنعمو بتعبهم!

واذا ما بتعرفو شو معنى إنو اسودت الدني بِوِجنا، عملولكم كزدورة عالبيوت المعتمة بالليل ببيروت وبالاشرفية، وع برادات الاوادم بكل هالوطن!

واذا انتو على خلاف مع معنى الانسانية وطبيعة البشر، نحن بعدنا متل ما ربنا خلقنا من لحم واحساس ودم!





بكفي تتغدونا قبل ما نتعشاكم. بكفيكم تكديس ثروات وانتو مش اكثر من كمشة تراب. بكفي تتناكفو كرمال كراسيكم وانتو صرتو مفضوحين بكل اعلام العالم بسبب اعمالكم وثرواتكم اللي ما بقى تستوعبها الارقام. بكفي تستعملو اخوتنا العسكر والاجهزة الامنية لتمنعونا نبكي ونعبر عن وجعنا. بكفي ترقصو ع جثثنا. بكفي تحرمونا من حياة كريمة ربنا عطانا ياها لمرة وحدة. بكفي تستهبلونا بوطنيتكم وانتو مش مارقين من حدها.

عن جد شو بعد بدكم؟

يا خيي لاقولكم شي طريقة لَ تصفونا كلنا، عالقليلة ببطل حدا ينق عليكم وبترتاحو منا وبتسرقو متل ما بدكم!

عن جد ما بقى عم نفهم انتو من شو مكونين؟

طيب انتو ما انتخمتو بعد؟ قدي بعد بدكم اموال وممتلكات وسلطة لتشبعو وكرمال شو؟

انتو كيف بتنامو بالليل؟ كيف ضميركم بيرتاح؟ منين بتجيبو هالوقاحة بحججكم الفوقية والبلا اساس، لما بتتحفونا بشعارات ومشاريع بلا طعمه وفارغة مثلكم؟

ليش نحن وين ما كان منعيش بكرامتنا وتعبنا الا بوطننا اللي قدمنالو كل شي ولليوم ما قدملنا شي؟


مش انتو السبب؟ اكيد انتو السبب ورح يزنر التاريخ اساميكم بأحرف شيطانية مخطوطة باللعنات ودم اجرامكم، ليشهد كل الكون ولآخر المدى، إنو ما سبق حكام اخذوا من شعبهم كل شي وبعدها فجرو وفقرو وذلو وباعو لكل محتل استغل جشعكم وكِفِرْكُم وخيانتكم لتضحيات كل اللي راحو تنبقى ويبقى لبنان.

هلقد انتو رخاص، وهلقد بعين الاوادم بتبقى كبير يا وطني.

73 views0 comments