ساعة بيلبس ابيض تيبسط عمرو دياب
ساعة بصور صحون الاكل تيفرجينا إنو عييش
ساعة بيتعمشق بالسيغار وهوي مستعيرو
ساعة بخبرنا إنو حضر عيد ميلاد وديع الشيخ مع إنو كان وجودو كمالة عدد
ساعة بقلنا إنو عندو سهرة كبيرة وهوي بكون معمشق ع ضهر حدا
ساعة بضوي تماثيل وهوي قاعد عالعتمة
ساعة بنظم حفلة لميادة الحناوي وهاني شاكر وإيهاب توفيق تيأكدلنا انو لبنان باللوج
ساعة بكون "الدريس كود" تبعو روز كرمال عيون ميريام كلينك
ساعة بولع الدني هشك بشك وفرقيع وهوي تحت سابع أرض
ساعة بيرقص عالتيك توك ليبرهنلنا إنو بحب الحياة
ساعة بيقعد بجاط السوشي تيقلنا إنو هوي كلاس
ساعة بحط صورو بالمناسبات العامة مع افراد المنظومة تيفرجينا إنو هوي "بابليك فيغر" وواصل وبحقلو يترشح عالنيابة
ساعة بيحكينا بالسيادة والاستقلال وهوي مبطوح قدام العملا
ساعة بذكرنا بالكرامة وهوي باري اجريه ع عتاب الخونة والبواب العالية
ساعة بيرقص عالطاولات تيبرهنلنا قديشو مبسوط
ساعة بيتصور حد شعار "توتال انيرجيز" تيأكدلنا إنو لاعب اساسي بإنو صرنا بلد نفطي
وساعات بيدفع مصاري ليجمع متابعين تيثبتلنا إنو اقوى بلوغر
بينما كل الوقت بطم راسو بالتراب تيخبرنا إنو هوي ولبنان بألف خير...
الواقع بقول إنو القصة بطلت قصة شعب عييش إنما بالأحرى شعب مأفلس. الاكيد كمان، إنو لا نحن ولا لبنان بخير. بإختصار، إذا ال ٢٥%، الطاوشين الدني بكل شي هستيري عم بصير عنا بهالايام وبهالوضع، هني المعيار لحجم مأساة ال ٧٥% الباقيين، بكون مقياس إقتصادنا هوي الرقص والطقش والمظاهر الكذابة.
تذكرو بس، إنو لليوم ومن ٤ آب ٢٠٢٠ في عنا ناس بعد ما التقيت جثثها، وإنو كتير من الأدوية وحليب الاطفال صارو كماليات، وإنو اصغر مرض صار بشكل اول خطوة عالمقبرة، وانو بنيتنا التحتية كلا مدمرة، وانو راتب العسكري صار ٦٠$، وانو العتمة عنا مش بس خلف بواب المدافن، وانو مياهنا ملوثة بشلالات من الامراض، وانو تنكة البنزين ب ١.٨ مليون بينما الحد الادنى ٥ مليون، لحد ما صار الانسان عنا ارخص شي بهالبلد!!
بس تذكرو واستغفرو الله بكل شي عم تعملو.
جورج يونس