الدُّوري ما بهاجر

مارونايت نيوز

الدُّوري عصفور لبنان الوفي، ما بيترك، ما بفل، ما بهاجر، بعيش بلبنان!

بكل الفصول باقي. وبكل الظروف عايش! إذا الحرش عنوانو، بهالحرش بعيش، ويمكن يطير من شجرتو بهالحرش ع شجرة تاني بحرش قريب. بزور شوية ضيع حواليه، ويمكن يعشش بشي صنوبرة بين هالبيوت.

جيرانو نحن، وهو جارنا الصغير. بيتفرج علينا، وبصير يعرفنا واحد واحد، لأنو كل يوم بشوفنا، بس مش كل يوم مننتبهلو.

بيعرف مين بطل هون، وبكمل مع يللي بقيوا قصة يومية بتتكرر مع كل صيحة ديك. حتى ببيروت الديك بصيح. قولكن فرنسا قارطة الديك من عنّا متل ما قرطوا كتير قصص؟ بتبرم باريس من أولها لآخرها، ما بتسمع صوت صوص!

بس الدُّوري وأصحابو هون ما بهزوا من مطرحن، حتى لو احترق الحرش واحترق معو العش! هيدا الأصيل بيبقى وبينطر، والحرش بيرجع بيخضر.

متل الدُّوري، الصقر هون بضل، لو قد ما علّا بيبقى فوق لبنان.

هالدُّوري الختيار يللي تعود ع أهل الضيعة، ويللي بزقزق تيوصل أخبارو لدُوري بيروت، لأنو كمان ببيروت مش بس في ديك بصيح، في دُوري بزقزق. تنيناتن، بعد هالعمر، خبروا بعضن إنو كتار من جيرانن هاجروا مع عصافير مهاجرة وطاروا معن ع مطارح بعيدة، ما فيها ديك بصيح، ولا فيها صنوبرة بتحمل ثمر وبتضّل خضرا كل السنة، ولا فيها عصفور بيعرف أسامي جيرانو.

فكر هالدُّوري وفكر كتير، ليعرف شو هو الشي العندو ياه، بس جيرانو عم بفتشوا عليه مع كل عصفور مارق وفالل؟

سأل حالو: معقول يكون هوّي عرف سرّ الطبيعة وسرّ الحياة؟ إنو كيف ما برمت بترجع لأصلها الصحيح هون، ومش بمطرح تاني؟ رجع سأل حالو: معقول منّن متلي متمسكين بالغصن والشجرة والشمس والجبل والبحر؟ بس هنّي كمان بيعشقوا لبنان وشمسو وجبلو وبحرو!

يمكن لأني أنا دُوري، هون خلقت، وهون بموت، وهون خلق بيي وجدي، وهون ماتوا، ويمكن لأنو هون ابني الدُّوري بكمل؟ هون بنيت كذا عش، وهون طيرتلي العاصفة ياهن، بس كمان هون رجعت عملت عش جديد فوق هالأرض العتيقة يللي ما ختيرت! هون ريحة الزعتر البريّ بعز شوبات الصيفية بتخلي عقلي يطير قد ما حلوة. وصوت الشتي لما تكون كابسة بخليني كنكن بأمان بهالصنوبرة. وبنطر وبطير بس تصحى، وبرجع بكنكن بهالبردات، وبنطر الربيع. بنطرو لأني عارف إنو جايي. بنطرو حتى لو طوَّلت الشتوية كتير وتأخر تيوصل!

أنا الدُّوري يللي بقيت، وبقيوا ريشات جوانحي ما تغيروا، ولا تغير لونن. بعدن بيحملوني من شجرة لشجرة بالحي وبالحرش يللي خلقت وعايش فيه. متل ما ناطر الربيع بعز الشتي، هيك ناطر جيراني يللي راحوا مع العصافير المهاجرة يرجعوا.

الفرد بارود