كتار عم يسألو، كتار مش عم يستوعبو، كتار مستغربين، كتار مش مصدقين!
كيف بدكم ياهم يصدقو وفيه مليون و٤٠٠ الف لبناني عم يرقصو ويزمرو ويتصورو ويتفشخرو وع طول مولعينا؟
كيف بدكم ياهم يستوعبو إنو هالعدد منو صغير وبيقدر بكل بساطة يكذب عالكون إنو كل اللبنانيي بألف خير؟
كيف بدكم العالم يحس بوجعنا وما في كرسي بمطاعم ومراقص ومراكز تزلج كل لبنان فاضية بسببهم؟
إنت اذا مرقت بالصدفة ع صفحات كتار من هالمليون وشوي وشفت السُفَرْ عمرانة بكل ما لذ وطاب والاراغيل واللبس والتفشيخ والجوالات والبراندز والعنطزات والهشك بشك بتصدق انو نحن بأزمة؟
لَ حظنا الاسود، إنو العالم ما بشوف الا الهوبرة والبرستيخ والحياة الزهرية، في حين كتير قلال اللي بفكرو انو مقابل هالمليون وشوي في ٤ ل ٥ مليون صارو تحت سابع أرض والفقر كواهم!
لكل المغشوشين والمبهورين باللايف ستايل تبعنا، حتى بالازمات، منحب نخبركم، إنو المليون و٤٠٠ مش محسوبين علينا وهني برات تفاصيل وجعنا وعايشين بغير دني. هيدول دفنو الحس الانساني خلف النكران بعد ما دفنو روسهم بالتراب قدام كل شي عم بصير مع اخوتهم بالوطن والمعاناة.
نحن يا سامعين الصوت صار كل شي هم عنا، وكل شي بيتجسد بمصيبة ع راسنا، من خزان المحروقات بسياراتنا وبيوتنا لما بيفضو، ل قنينة الغاز لما بتخلص، ل الدوا لمن منوصل لإخر حبة، لمجمع الحليب بس يصير ع إخر، لقسط الولاد لما بيستحق، ولغالون الزيت بس ينشف، وكمل ع كل فاصلة بحياتنا التعيسة المستجدة.
بينما المليون وشوي اللي مش عايشين مأساتنا، هني من غير دني، شي منهم من جماعة الفريش، وشي من جماعة اصحاب الاحزاب والزعامات والمصارف، وشي من جماعة رجال الدين والحياة الرغيدة، وشي من جماعة الاغتراب، وشي من جماعة اللي هربو مصرياتهم قبل ما تنهيها المصارف، وشي من جماعة تجار الأخضر واليابس والتشبيح والسوق السودا...
وهون بحقلي اسأل سؤال يمكن: "يا هل ترى رجال الدين عنا حاملين نفس الصلبان اللي نحن عم نحملها كل يوم؟"
بالمختصر هيدا لبنان الكذبة، هيدا لبنان الشو أوف، هيدا لبنان اللي ما بيشبه الواقع اليوم، هيدا لبنان الماضي اللي راح والمستقبل الضايع ع عتبات القلوب الميتة.
وبتوقف الحقيقة قدام كل طفل بوطني مش قادر يحصل ع مجمع حليب، وقدام كل طالب ما بقى قادر يكمل علمو متل ما بدو. وقدام كل مريض مش قادر يتعالج، وقدام كل حلم عم بموت، وقدام كل رب عيلة وشب بلا شغل، وقدام كل متوفي مش قادر يضمن تكلفة دفنو، وقدام كل إنسان عم يتحمم بعز البرد بالمياه المصقعة، وقدام كل خي بهالوطن مش قادر يدفي بيتو بهالبرد، وقدام كل رب أسرة قرر يلغي ساعة الكهربا لأنو ما معو يدفع الاشتراك الجديد (الجزية)، وقدام كل براد فاضي من برادات إخوتنا بهالتعتير...
ما بقى ينفع الدجل والتصنع بإيام صارت فيها الحياة لكتار منا كذبة.
هلقد بحبك يا لبنان
جورج يونس