الكل فيه بيكذب عالكل، والصغير فيه بيضحك عالكبير، والكبير فيه بيستهبل الصغير، والغني بيستكرد الفقير، والفقير بيستغبي الغني، وقد ما شعبو تأثر بالالمان صار"جوزف غوبلز" هوي المثال الاعلى عنا!
بالتسويق عنا جنات، وبالعمل نحن قدرات، وبالادارة كلنا فلتات، وبالنظام ملوك الأُطروحات، وببناء الدولة جامعات، وبالتركيبات ابداعات، وبالفهم منوعات.
وبما انو الحكي ما عليه جمرك، فينا نبلط البحر بنص ساعة، وبغمضة عين منغير لون السما، ونزرع بطاطا لنطلع كهربا، ونحكي بالمكننة وسجلاتنا بعدا ع دفاتر عثمانية، ونتأهل بالضيف عالمطار ونخطفو بالبقاع، ونشحد الملح لنبيعو علب، ونلعن الاميركان ونسوق سياراتهم ونقتل حالنا لناخذ الغرين كارد، ونْصَدِرْ بندقة بإسم الشطارة، ونكوي الفوضى لنوزع برستيج، وندق الحديد هوي وحامي لنقطف اسعارو، ونخترع جمعيات لنسرق مساعدات، ونزرع سواد بمكبات عشوائية، ونستعير ثياب من الجيران والاصحاب لنفشخ ع غيرنا بالاعراس والحفلات، وندخن سيجار بالدَيْن ونحن ما معنا نمشي، ونعمل كاياكينغ بسدود فاضية من الماي، وناكل بيض فري مربى ع بلاكين الاشرفية، ونقطف فواكه وبندورة عن سطوح بيوتنا، ونستخرج بترول من مجارير الايدن باي، وننتخب ملكات جمال بأسامي كل الفواكه والخضرة اللي عنا،
ونمول الدولة بأيداعات الفقرا والمغتربين والاجانب، ونستورد سيارات عالكهربا ونحن ببيوتنا ما عنا كهربا، ونعمل كشك بالحليب الخالصة مدتو، ونسقي مزروعاتنا بخيرات نهر الليطاني المسرطنة، ونبيع طاقة شمسية لجزر المالديف من الواح طاقة مركبينا ع سلسلة لبنان الشرقية، ونعلم الدول المتقدمة كيف بيبنو نظام ومؤسسات ووطن بدون موازنات، ونجيب ايران وسلاحها لعنا وكل ما واحد حكي نعملو عميل سفارات، ونعمل جسر روحة رجعة ع قبرص منشان الويك اند، ونصير ملوك صناعة الطائرات المسيرة، والرياديين بإستحداث الطرقات المليانة بالحفر، وأُمراء قيادة السيارات ع الدروب المعتمة، ورواد البوتوكس والفيلير والجمال النادر والصعب، ونعبد ١٨ الله كل واحد حسب مصالحو، ونعمل عمليات جراحية بدون بنج، ونفجر عاصمتنا وحضارة عمرها ٦٠٠٠ سنة بمواد زراعية مش معروف لا مين استوردها ولا كيف انفجرت، ونهجر الادمغة من عنا لانها بتفهم، ونعمل من السفاح زعيم بنادي بالعدالة والشفافية وحقوق الانسان، ونقتل ولاد الطايفة ونسرقهم وندعي حمايتهم، ونصفي الرموز بواسطة الاشباح، ونحارب الفساد بدون ما نكمش ولا فاسد، ونحبس الاوادم لانو عم بطالبو ب ابسط حقوقهم، ونبشر بالديمقراطية ونحن ملوك الاقطاع والعبودية، ونْسِبْ الحزب والممانعة قبل الانتخابات ونعتبرهم شركاءنا ونتحالف معهم بعد الانتخابات، ونحمل لواء المحرومين ونتملك نص الجنوب، ونخترع اسطورة طائر الفينيق تيضلو زعماؤنا يدمرو هالوطن ونحن نرجع نعمرو، ونْخَلِفْ ولاد كرمال الحكام يقتلوهم، ونستضيف تجار المخدرات بالاعلام ونعمل منهم "بابليك فيغر"، وندفن شهادات بإسم المحسوبيات، ونستبدل ادوية السرطان بحبوب منع الحمل، وكملو تذاكي وابداعات ما بتخلص لتخلص الدني.
يا اهل الفكر، بمحيطنا، الصحرا صارت مليانة شجر بينما جبالنا عم تتصحر، وشطوطنا عم تتصخر، وقلوب كل مين وصل عالسلطة عم تتحجر، ونحن بعدنا مثل ما قال "جبران خليل جبران" بأيام المجاعة: "الشعب المتخلف الوحيد في العالم الذي يموت وهو يرفع صور قاتليه"، وبعدنا مع كل اللي صار فينا بطرانين عالفاضي، وسكرانين بالفوفاش، وكلنا منفهم بكل شي واكتر من الكل، ومش حابين نفوق من الكذبة اللي زرعناها خلف زعامات ما بتعرف من هالوطن الا العملة والعمالة والفساد وبوابة مصالح آخرتها جهنم.
نحن الشعب الوحيد بالعالم اللي ما بتكبر فيه الخسة، عند كل مناسبة، وعند كل مفترق طرق، الا براسو.
كتير هيك يا الله!