مأساة وطن

مارونايت نيوز - بوطننا نحن منعرف حجم مأساتنا.

بأيامنا اكتشفنا مين باع واشترى فينا، بلقمتنا فهمنا كيف شحذوا الناس تيحكموها، وبمستقبل ولادنا عرفنا مين خربهم وباعهم المخدرات بالجامعات.

بأحزابنا ومسؤولينا وعينا شو معنى وصدقية شعار #كلن_يعني_كلن.

بفرص العمل صار واضح إنو بسبب لوردات الحرب الانبطاح صار بوصلة الكفاءة، وتحولت الكرامة لمجرد وجهة نظر.

بديانتنا تذكّرنا إن الرسل من زمان حذّرونا من لصوص الهيكل والفريسيين.

بصلواتنا لمسنا كيف بعض رجال الدين حولوا الصلاة لباب رزق.

بانتخاباتنا تأكدنا إن الكذب هو ملح المرشحين، وسَكْرة المغفلين والمنتفعين.

بطرقاتنا شفنا قديش حياة شبابنا رخيصة.

بصدقنا كتبنا إنو الأدمي ما إلو محل بهالبلد.

بفكرنا خطّينا بالخط العريض: اللي ما بينبطح للواوية بموت من الجوع.

بصمتنا دفنّا الوجع خلف الحرقة.

بتراب مرفأ بيروت اندفنت الكرامة بأبخس من الفجل، ع إيدين أوباش السلطة.

بنضالنا زرعنا الشرف ع دروب المحاولة.

بمقاومتنا عرفنا معنى الذكرى والوفا لتاريخ الأبطال.

بمجتمعنا حاصرتنا النكبات بعد ما خلصت من عنا الرجال.

بغياب الدولة صار الوطن مرتع للفساد والسلاح غير الشرعي.

بخيانات البعض للبنان عرفنا شو يعني إنك تكون لعبة بأيدي الدول الخارجية.

بتجاربنا وعينا إنو وطننا بيبقى صغير قدام العواصف الكبيرة والمشاريع الإقليمية.

بدموع أمهاتنا فهمنا إنو ما بيستاهل العمر نضحي بشبابنا لعقائد وهمية.

بخسارتنا لسنيننا تذكّرنا إنو الحياة قصيرة.

وبالعواصف الدولية اللي عصفت ببلدنا عبر التاريخ فهمنا إنو ما فينا نلعب صولد ع مصير شعبنا.

الخيانة ما بتشبع من كبريائنا الفارغ ولا من رخص دم شعبنا، وقت نضحّي فيه كرمال دول تانية.

ومع أسراب الغربان اللي ما عم توقف تحلّق بسمانا من كم سنة بسبب تفرد البعض منا بالقرارات المصيرية وتعنتهم، بيكملوا الأحرار يصرخوا بوجه الغوغائيين وبوجه كل واحد بيتاجر بمصير ودم شعبه وبيرتهن للمال الإقليمي:

"شيلوا الإيد اللعينة واتركوا المكان، أكتر عيون حزينة هي عيون لبنان."

جورج بونس

Pilgrimage to Lebanon

Buy Now